‘കുത്തിയോട്ടം’ എന്ന പദത്തിന്റെ വ്യുത്പത്തി : ഒരു നിരീക്ഷണം

കുത്തിയോട്ടം : പദവും ആചാരവും – ഒരു വ്യാഖ്യാനശ്രമം

‘ഓട്ടം’ എന്ന പദത്തിന്റെ ആചാരപരമായ അർത്ഥസൂചനയെ അടിസ്ഥാനമാക്കി കുത്തിയോട്ടം അനുഷ്ഠാനത്തെ
 വിശദീകരിക്കുന്ന ഹരികുമാർ ഇളയിടത്തിന്റെ ഗവേഷണ നിരീക്ഷണം

കേരളത്തിലെ ദേവീക്ഷേത്രങ്ങളുമായി ബന്ധപ്പെട്ട പ്രധാന അനുഷ്ഠാനങ്ങളിലൊന്നാണ് കുത്തിയോട്ടം. പ്രത്യേകിച്ച് ചെട്ടികുളങ്ങര പോലുള്ള പ്രദേശങ്ങളിൽ ഈ അനുഷ്ഠാനം വിശേഷമായി ആചരിക്കപ്പെടുന്നു. ഈ ആചാരത്തിന്റെ ചരിത്രവും സാംസ്കാരിക പശ്ചാത്തലവും സംബന്ധിച്ച് പല പഠനങ്ങളും ഉണ്ടായിട്ടുണ്ടെങ്കിലും ‘കുത്തിയോട്ടം’ എന്ന പദത്തിന്റെ വ്യുത്പത്തിയെക്കുറിച്ച് വ്യക്തമായ ഒരു ധാരണ രൂപപ്പെട്ടിട്ടില്ല. മുൻകാല പഠിതാക്കൾ സാധാരണയായി ‘കുത്തിയോട്ടം’ എന്ന പദത്തെ ‘കുത്തുക’ + ‘ഓടുക’ എന്ന രീതിയിലാണ് വ്യാഖ്യാനിച്ചിട്ടുള്ളത്. അനുഷ്ഠാനത്തിന്റെ മർമ്മമായ ചൂരൽകുത്ത് എന്ന കർമ്മത്തിനുശേഷം ഭഗവതീ ക്ഷേത്രത്തിലേക്ക് വേഗത്തിൽ പോകുന്നതാണ് ‘ഓട്ടം’ എന്ന പദത്തിന്റെ അർത്ഥമെന്നായിരുന്നു പൊതുവായ വിശദീകരണം.

എന്നാൽ, ഈ വ്യാഖ്യാനം അനുഷ്ഠാനത്തിന്റെ ആന്തരിക താത്പര്യത്തെ പൂർണ്ണമായി വ്യക്തമാക്കുന്നില്ലെന്ന സംശയം എനിക്ക് തോന്നിയിരുന്നു. ‘ഓട്ടം’ എന്ന പദത്തിന് ‘വേഗത്തിൽ പോകുക’ എന്നതിനപ്പുറം ഏതെങ്കിലും ആചാരപരമായോ പവിത്രമായോ ഉള്ള ഒരു പ്രത്യേക അർത്ഥസൂചന ഉണ്ടായിരിക്കാമെന്നായിരുന്നു എൻ്റെ ധാരണ.

ഈ സംശയം മനസ്സിൽ വച്ചുകൊണ്ട് ഞാൻ ഈ വിഷയത്തിൽ കൂടുതൽ അന്വേഷണം നടത്തി. ആ അന്വേഷണത്തിന്റെ ഭാഗമായി വിവിധ ഫോക്‌ലോർ ഗ്രന്ഥങ്ങളും പഠനങ്ങളും പരിശോധിക്കുകയായിരുന്നു. ആ സമയത്താണ് ‘ഓട്ടം’ എന്ന പദം ചില സന്ദർഭങ്ങളിൽ മന്ത്രവാദപരമായോ ഉച്ചാടനപരമായോ ഉള്ള കർമ്മങ്ങളെ സൂചിപ്പിക്കുന്ന പ്രയോഗമായി ഉപയോഗിക്കപ്പെടുന്നുവെന്ന സൂചനകൾ ശ്രദ്ധയിൽപ്പെട്ടത്. പ്രത്യേകിച്ച് കണിയാൻമാർ എന്ന ജാതി വിഭാഗം നിർവഹിക്കുന്ന ഉച്ചാടനകർമ്മങ്ങളുമായി ബന്ധപ്പെട്ട പ്രയോഗങ്ങളിൽ ഈ പദം കാണപ്പെടുന്നു. 

ഫോക്‌ലോർ പഠിതാക്കളായ S. K. Nair, Chummar Chundal എന്നിവരുടെ രചനകളിൽ നിന്നുമുള്ള സൂചനകളും ഈ ധാരണയെ ശക്തിപ്പെടുത്തുന്നതായി തോന്നി.

ഈ പശ്ചാത്തലത്തിൽ നോക്കുമ്പോൾ, ‘കുത്തിയോട്ടം’ എന്ന പദത്തെ ചൂരൽകുത്തിലൂടെ ഈതിബാധകളെ വിമോചിപ്പിക്കുന്ന ഒരു ഉച്ചാടനസ്വഭാവമുള്ള ആചാരമായി വ്യാഖ്യാനിക്കാൻ കഴിയും എന്നതാണ് എൻ്റെ നിരീക്ഷണം.

ഈ വ്യുത്പത്തി സംബന്ധിച്ച ആശയം ഞാൻ എൻ്റെ പഠനഗ്രന്ഥങ്ങളായ “Chettikulangara Kumbhabharani – Odanadinte Poorotsavam; Kuthiyottam Kettukazhcha” (2023) എന്ന കൃതിയിലും “Kuthiyottappattukal: Oru Padanam” (2025) എന്ന ഗ്രന്ഥത്തിലും വിശദമായി അവതരിപ്പിച്ചിട്ടുള്ളതാണ്.